Teri khushbu ka pata karti hai | Mujh pay ahsaan sun-hwa karti hai

تیری خوشبو کا پتا کرتی ہے

مجھ پہ احسان ہوا کرتی ہے

چوم کر پھول کو آہستہ سے

معجزہ باد صبا کرتی ہے

کھول کر بند قبا گل کے ہوا

آج خوشبو کو رہا کرتی ہے

ابر برسے تو عنایت اس کی

شاخ تو صرف دعا کرتی ہے

زندگی پھر سے فضا میں روشن

مشعل برگ حنا کرتی ہے

ہم نے دیکھی ہے وہ اجلی ساعت

رات جب شعر کہا کرتی ہے

شب کی تنہائی میں اب تو اکثر

گفتگو تجھ سے رہا کرتی ہے

دل کو اس راہ پہ چلنا ہی نہیں

جو مجھے تجھ سے جدا کرتی ہے

زندگی میری تھی لیکن اب تو

تیرے کہنے میں رہا کرتی ہے

اس نے دیکھا ہی نہیں ورنہ یہ آنکھ

دل کا احوال کہا کرتی ہے

مصحف دل پہ عجب رنگوں میں

ایک تصویر بنا کرتی ہے

بے نیاز کف دریا انگشت

ریت پر نام لکھا کرتی ہے

دیکھ تو آ کے چہرہ میرا

اک نظر بھی تری کیا کرتی ہے

زندگی بھر کی یہ تاخیر اپنی

رنج ملنے کا سوا کرتی ہے

شام پڑتے ہی کسی شخص کی یاد

کوچۂ جاں میں صدا کرتی ہے

مسئلہ جب بھی چراغوں کا اٹھا

فیصلہ صرف ہوا کرتی ہے

مجھ سے بھی اس کا ہے ویسا ہی سلوک

حال جو تیرا انا کرتی ہے

دکھ ہوا کرتا ہے کچھ اور بیاں

بات کچھ اور ہوا کرتی ہے

پروین شاکر

teri khushbu ka pata karti hai
mujh pay ahsaan sun-hwa karti hai
choom kar phool ko aahista se
moujza bad Saba karti hai
khol kar band quba Gul ke sun-hwa
aaj khushbu ko raha karti hai
abr barsay to inayat is ki
shaakh to sirf dua karti hai
zindagi phir se fiza mein roshan
Mashal barg hina karti hai
hum ne dekhi hai woh ujli saa-at
raat jab shair kaha karti hai
shab ki tanhai mein ab to aksar
guftagu tujh se raha karti hai
dil ko is raah pay chalna hi nahi
jo mujhe tujh se judda karti hai
zindagi meri thi lekin ab to
tairay kehnay mein raha karti hai
is ne dekha hi nahi warna yeh aankh
dil ka ahwaal kaha karti hai
mshf dil pay ajab rangon mein
aik tasweer bana karti hai
be niaz kaf darya angisht
rait par naam likha karti hai
dekh to aan ke chehra mera
ik nazar bhi tri kya karti hai
zindagi bhar ki yeh takheer apni
ranj milnay ka siwa karti hai
shaam parte hi kisi shakhs ki yaad
koocha jaan mein sada karti hai
masla jab bhi charaghoon ka utha
faisla sirf sun-hwa karti hai
mujh se bhi is ka hai waisa hi sulooq
haal jo tera anaa karti hai
dukh sun-hwa karta hai kuch aur bayan
baat kuch aur sun-hwa karti hai
parveen Shakir