Sar e mimber wo khwabon ke mehal tameer kartay hain | Habib Jalib

سرِ منبر وہ خوابوں کے محل تعمیر کرتے ہیںعلاجِ غم نہیں کرتے فقط تقریر کرتے ہیں

بہ ہر عالم خدا کا شکر کیجئے اُن کا کہنا ہے

خطا کرتے ہیں ہم جو شکوہء تقدیر کرتے ہیں

ہماری شاعری میں دل دھڑ کتا ہے زمانے کا

وہ نالاں ہیں ہماری لوگ کیوں توقیر کرتے ہیں

اُنہیں خوشنودئ شاہاں کا دائم پاس رہتا ہے

ہم اپنے شعر سے لوگوں کے دل تسخیر کرتے ہیں

ہمارے ذہن پر چھائے نہیں ہیں حرص کے سائے

جو ہم محسوس کرتے ہیں وہی تحریر کرتے ہیں

بنے پھرتے ہیں کچھ ایسے بھی شاعر اس زمانے میں

ثنا غالب کی کرتے ہیں نہ ذکرِ میر کرتے ہیں

حَسین آنکھوں،مُدھر گیتوں کے سُندر دیس کو کھو کر

میں حیراں ہوں وہ ذکرِوادئ کشمیر کرتے ہیں

ہمارے دردکا جالب مداوا ہو نہیں سکتا

کہ ہر قاتل کو چارہ گر سے ہم تعبیر کرتے ہیں

(حبیب جالب )

Tags

Sar e mimber wo khwabon ke mehal tameer kartay hain,Habib jalib poetry,Habib Jalib,Recent,poetry,TIKTOK Best Poetry,