Dhul gai sari kasafat mein madinay a gaya | Ali Zaryoun

دھل گئی ساری کثافت ! میں مدینہ آ گیا

ہو گئی مجھ پر بھی رحمت ! میں مدینہ آ گیا

گنبدِ خضری کو دیکھا ! دیکھتے ہی یوں کہا

اب مجھے کس کی ضرورت ! میں مدینہ آ گیا

“ یا رسول اللہ اُنظر حالنا “ کہتا ہوا

سر بہ سر غرقِ ندامت میں مدینہ آ گیا

اب تری آواز کیا ہے سانس تک اونچی نہ ہو !!

دیکھ ! میرے دل کی حالت ! میں مدینہ آ گیا

کس طرف دیکھوں ، کدھر رو لوں کدھر سجدہ کروں

ہر قدم ہے اک زیارت میں مدینہ آ گیا

پریت کو دل میں لیے اور اشک آنکھوں میں لیے

لے کے یہ سامانِ مدحت میں مدینہ آ گیا

دوستوں کی سازشیں یا دشمنوں کی تہمتیں

اب نہیں کوئی شکایت میں مدینہ آ گیا